Connie H.: USA siuttuunngippat nunat allat nieriarnavianngillat

Sila pillugu aappaagu decembarimi ataatsimeersuartoqalertinnagu, kikkut tamarmik akuerisinnaasaannik, silamut avatangiisinullu tunngasumik, USA politikkiliussasoq, silap pissusaa pillugu, avatangiisinullu, Danmarkimi ministerip taassuma ilimagilereerpaa.

Tuluit nunarsuaq tamakkerlugu TV-kkut aallakaatittagaanni, BBC Worldimi, HARDtalk-imi, ullumi aallakaatinneqartussami, apeqqarissaarfigineqarami ernumassuteqanngivinnini Connie Hedegaardip erseqqissaatigaa.

- USA-mi nunarsuatsinni iliuuseqarnissani siuttuunngippat, ilimagineqarsinnaavoq nunat allat aamma nikeriarnavianngitsut. Tamanna paasissallugu pingaartuuvoq, Connie Hedegaard oqarpoq.

-USA nunarsuarmi CO2-mik aniatitsinerpaatut aniatitsinerup millisarnissaanut siuttuusariaqarpoq. Taamaalilluni nunarsuarmi pisunut eqqummaarinnerulissaaq.

HARDtalk-imi apeqqarissaartoq Stephen Sackur, oqarpoq, USA-mi kina prædidentinngussanersoq maanna nalunarluinnartoq, USA-milu aningaasarsiorneq ullumikkorpiaq ajotoorluinnarsimasoq.

-Aap, tamaakkaluarpoq, kisianni præsidentimut qinigassanngortittut partiivisa tamarmik nukissiuuteqarnikkut CO2-mik aniatitsinerup qummut killeqalersinnissaa qineqqusaarutigereerpaat. Oqarpummi ikummatissat avataaneersut USA-p killilersortariaqalerai, taakku CO2-mik aniatitsinermut pissutaanerpaammata. Imaanngilaq USA nammineq nunatamini uuliasiornerulissasoq. Siunertaavorli nukissiorneq ataavartoq, anorimik, seqinermik allamilluunniit aallaaveqarsinnaasoq, USA-mi atorneqarnerulissasoq, Connie Hedegaard oqarpoq.