Congomi pikitsitsisut sakkutuunit qimaatinneqarput
Pikitsitsisut illoqarfiup Gomap tiguarnissaa aarlerisaarutigigaluarlugu manna tikillugu sakkuaakkunnaarallarnissamik isumaqatigiissut malippaat. Naalaagaaffiit Peqatigiinneersut EU-meersullu naggueqatigiit assigiinngitsut isumaqatigiinniartinniarsarigaluarpaat, ukiulli qulit sinnerlugit eqqissiviilliortuarsimaneq qanittukkut qaangerneqassangatinneqanngilaq.
Congomi ulluni makkunani pisut paasiniassagutsigit 1996-imi naalagaaffiup iluani pikitsitsinerup siornatigut pisimasut eqqaamasariaqarput. 1994-imi Congop saniliani Rwandami naggueqatigiit Hutut Tutsillu sakkortuumik akersuupput, Hutullu Congomut qimaasimasut ulloq manna tikillugu eqqissiviilliortitsiuarput. Naggueqatigiit ikinnerussuteqartut, siornatigut nungusarneqarsimasut, Tutsit Hutunit pikitsitsisunit illersorneqarnissaat pikitsitsisut ilaannit piumasarineqarpoq. Hutut isumannaatsumik Rwandamut utersinnaanerat akornuserneqartuarpoq, Hutullu Congomiit aniatinnagit Congomi pikitsitsisut ilaasa siuttuat eqqissineqarnissaanik tusarusunngilaq.
