Congomi pikitsitsiniat saassussinissaat ilimagineqarpoq
Pikitsitsiniat Gomamut saassussinissaat qimaasorpassuit utaqqiinnalerpaat, nerisassaaleqillutillu imissaaleqigaluartut, koleramillu nappaatillit timmiinnalersut ikiuiniaqatigiit ikiorseriarsinnaanngilaat. Sumiiffimmi sakkortuumik sakkuaattoqarnera pissutigalugu Naalagaaffiit Peqatigiit ikiuiniaqatigiiffianniit qanillattorneqarusunngillat.
Rwandami 1994-mi pikitsitsisoqarujussuarnerata kingorna naggueqatigiit Hutut Congomut qimaasut taamanikkulli Congop ilaani peqqarniisaartuarmata, Congop kujasinnerusortaaniittut naggueqatigiit Tutsit, Congop sinneraniit ikiorniarneqarput. Rwandami naalakkersuisut Hutunik Congomut isaatitsisimanerarlugit Congomi naalakkersuisut avoqqaarinnipput, Rwandamiilli sunniuteqannginnerarput. Naalagaaffiit Peqatigiit sakkutuui 17.000-it Congomiipput, pikitsitsiniallu Gomamut isaalissappata akersuuttariaqalissallutik. Sakkutuut amerlanerujussuit pisariaqartinneqaraluartut tamanna qanittukkut pisinnaanavianngilaq. Sakkutuummi amerlanerit ikiortiserissagaluaraanni politikkikkut qullersat akuersitinniariarlugit aningaasartuutissat nassaariniartariaqassapput, taamaalippallu naalagaaffiit sorliit qassinik sakkutuulliisinnaanersut aalajangerneqareerpata, aatsaat ataqatigiissaarneqalersinnaapput. Piffissallu periareersarfiup ingerlanerani qimaasorpassuit ajunaareersimassapput.
