Concorde pillugu eqqartuussineq aallartippoq
Amerikamiut timmisartortitseqatigiiffiat Continental Airlines inuillu tallimat eqqartuussivimmut sassartinneqarput.
Timmisartorsuup Concordep Parisimi Charles de Gaulle-p mittarfianit qangattarsimatsiaannarluni ikuallalernera taama nipeqarpoq. Timmisartoq mittarfimmit kilometerinik arlaqanngitsunnguanik ungasitsigaluni nakkarpoq, timmisartullu inuttaasa 109-usut saniatigut inuit nunamiittut sisamat ajunaarlutik. Aaqqiagiinnginneq ullumi eqqartuussivimmut pisoq franskit timmisartuata Concorde-p amerikamiullu timmisartortitseqatigiiffiata Continental Airlinesip akornanni pinngorpoq. Taamanikkut 2004-mi misissuinerni timmisartumit Continental Airlinesimeersumit savimerngup ilamernga mittarfimmut katanneqarsimasoq ajunaarnermut pissutaatinneqartutut aalajangiunneqarpoq. Savimerngup ilamerngata taassuma Concordep assakaasui alissimassagunarpai ajunaarnermullu kamanaatsumut pissutaalluni. Isuma taanna Concordemut illersuisup aamma ullumi aalajangiusimavaa.
- Savimerngup ilamernga taanna Continental Airlinesimeersoq mittarfimmiissimanngikkaluarpat, taava Concordemi ajunaarnerit tulleriiaat pisimassanngikkaluarput. Nerriviup illuatungaaniippoq Continental Airlinesip illersuisua, taannalu juulimi 2000-imi qanoq pisoqarsimanera pillugu tupinnanngitsumik allatut nassuiaatissaqarluni.
- Uppernarserusupparput immikkut paasisimasallit manna tikillugu suna akueriumannginneraat, tassalu savimerngup ilamerngata mittarfimmiittup apunnginnera 8 sekuntinik sioqqullugu Concorde ikuallalersimasoq. Continental Airlinesip peqataatitaasa saniatigut inuit tallimat unnerluutigineqartut issiavianniipput, taakkua ilagalugit mekanikerit teknikkikkullu akisussaasut Concordep piginnittuanit Air Francemeersut Continental Airlinesimeersullu. Killisiuinerni ajunaartunut ilaqutaasut ikittunnguit taamaallaat najuupput, taakkunanngami amerlaqisut ajunaarnerup kingornali Air Francemit taarsiivigineqarsimammata, taakkua timmisartortitseqatigiiffimmik eqqartuussivilersuussinissaat pinngitsoorniarlugu.
Parisimi eqqartuussinerup maaji sioqqullugu naammassineqarnissaa ilimagineqanngilaq.
