Colourful Nuuk nersornaaserneqartoq
Nersornaat takornariaqarneq pillugu saqqummersitsinersuup Vest Norden Travel Martip Nuummi ulluni makkunani ingerlanneqarnerani tunniunneqarpoq.
Tusagassiortut marluk angalasartut nersornaat Colourful Nuummut tunniuppaat tassanilu qaammarsaanermi suleqataasimanera tunngavilersuutigaat.
Aammattaaq Colourful Nuuk illoqarfiit pingaarnersaanni takornarialerinermut iliuusissalerisimanera, najukkami takoriaqarneq pillugu pikkorissaasarsimanera najukkamilu takornariaqarnermut nutaanik isumassarsiortitsinermut suliniutinullu tunngatillugu isumasioqatigiissitsisarsimanera tunngavilersuutigineqarput.
Colourful Nuup nersornaaserneqarnera Borgmesterip, Asii Chemnitz Narupip nuannaarutigingaarpaa.
- Colourful Nuuk piffissami sivikitsumi Nuuk takornariarfissuartut tikinneqartalerneranik annertuumik iluatsilluartumillu siunnerfilittut suliniutaaqataavoq, Chemnitz Narup oqarpoq.
