Coca-Colat nannutut qalipaateqassapput
Ilisimatuut avatangiisinillu illersuiniaqatigiit kisimiillutik nannut siunissaannik ernummateqarunnaarput. Tassami Coca-Colap suliffeqarfissuata Canadamiittup Pinngortitaq pillugu nunarsuaq tamakkerlugu suliniatigiiffik, suleqatigilerpaa. Taamaalilluni nannut ajornartorsiutaat inuinnarnit eqqumaffigineqarnerulerniassammata.
Allattoq Elisa Isaksen
oktobarip 31-at 2011 13:13
Coca-Cola nunarsuaq tamakkerlugu qillertuusanik aappaluttunik pooqartitsisartutut ilisimaneqartoq, ukiormanna juullip nalaani siullerpaamik Colanik qillertuusanik qaqqorinnik puulinnik 94 millioninik amerlassusilinnik tuniniaaniarpoq, nannumik arnavissamik pisaqqisartumik assitalimmik.
Coca-Colap qillertuusaatai qaqqoriit, Verdensnaturfondenip nannunut tunngasunut suliniutaanut atugassanik 15 millionit koruuninik isertitsissutaasussatut naatsorsuutigineqarput. Tamakkununnga ilaalluni nunap ilaa sikutalik allanngutsaaliugaq. Nuna tamanna allanngutsaaliugaq Nunatsinnut qanittumi Umimmaat Nunaanniittussatut takorloorneqarpoq.
Soorlu qillertuusani allaqqasussatut... Nannut uumaffiisa illersornissaannut ikiortigut.
