CO2 pillugu isumaqatigiissut nunatsinnit eqqortikkuminaappoq
Isumaqatigiissut 2001-imi atsioqatigiissutigineqarpoq. Aatsaallu ukioq manna, atsioqatigiinnerup ukiunik arfineq pingasunik qaangiuttorlu Naalakkersuisut annikillititsinissamik siunnersuummik saqqummiussaqarput.
Qinersereernerup kingorna naalakkersuisunngortussat annikillisitsinissamut ukiut marluk qaangilaarlugit periarfissaqassapput. Piffissaliussaq 2012-imut killilerneqarpoq. CO2-mik aniatitsinissamut Kyotomi isumaqatigiissutip piviusunngortinnissaanut naalakkersuisunngortussat ukiut marluk periarfissarissavaat.
Kyotomi isumaqatigiissut tunngavigalugu nunatta 2012-inngortinnagu CO2-mik aniatitsineq 1990-imut sanilliullugu 8 %-imik annikilliseriissavaa. Taamani ukiut aqqanillit appaanissamut piffissaliussaq naammattutut isigineqarpoq.
Aniatitsinernik annikillilerinissamut pilersaarut aatsaat ukioq manna februarimi isumaqatigiissutigineqartup imaraa 2012-inngortinnagu CO2-mik aniatitsinerup 8 %-inik annikillinissaa. Naalakkersuisunngortussat Kyotomi isumaqatigiissut eqqortissinnaajunnaaramikku maanna annikillileriniarnerup affaanik siuinniussaqarput. Naalakkersuisunut ilaasortap Kim Kielsenip "susaavinnermit pitsaanerunerunerarpaa."
Annikillileriniarmut suleriaasissaq qaammatip ataatsip ingerlanerani tusarniaavigineqassaaq. Illuatungiliuttut aniatitsinermik annikillileriniarnermi suleriaasissaq isoraat, kingusinaarnerarlugulu. Qinersineqariasaarmat naalakkersuinikkut anguniakkat tamarmik taamaatinneqarput. Ukioq manna februarimi saqqummiunneqarmat ukiut pingasut periarfissaliunneqarput. Maanna imaalerpoq 2012-inngortinnagu aniatitsinerup annikillilernissaanut piffissaliunneqartoq. Taamaasillutik naalakkersuisunngortussat ukiut marluinnaat ingerlaneranni CO2-mik aniatitsineq 180.000 tonsinik annikillilerinissamut piffissarilerpaat.
