CO2-mut iliuusissat kommunit kingusinaarsoraat
Namminersornerullutik Oqartussaniit iliuuseriniakkatut saqqummiunneqartut atorlugit, nunat tamat akornanni mingutsitsinginnerunissaq anguniarlugu imminnut pituttornerannut sanillersuussinaalernerput, KANUKOKA-miit qujaruneqaraluarluni, taama kingusitsigisukkut iliuuseriniakkat saqqummiunerat isornartorsiorpaat. Minerunngitsumik Kyotomi isumaqatigiissutit siorna 2008-mili atuutsinneqalermata, 2012-illu tungaanut anguniagassatut siunniunneqarlutik. Mingutsitsinerup annikillisarneranut iliuuseriniakkat inuiaqatigiinnut sunniutissaat qanorlu akeqarnissaat pillugit paasissutissat, Kommunit Kattuffiannit aamma ujartorneqarput. Iliuuseriniakkanut Qaasuitsup komunia sukumiinerusumik siunnersuuteqarput. Soorlu pisortat illuutaasa, namminersortullu suliffeqarfiutaasa tunisassiornerminni ulluinarnilu ingerlanermini qanoq mingutsitsitiginertik naapertorlugu akiliisinneqartalernissaat, kiisalu ilaqutariit atuisartutut mingutsitsinnginneruniarlutik iliuuseriniagaasa taperneqartalernissaat Qaasuitsup Kommunianit siunnersuutigineqarami, ataatsimullu isigalugu sukannernerusumik iliuuseriniakkat atuutsinneqarnissaat siunnersuutigineqarluni.
Kommuni Kujallermiit aamma mingutsitsinnginneruniarluni iliuuseriniakat timitalernissaannut peqataanissartik qilanaaraat, taqqavanimi erngup nukinga atorlugu nukissiorneq, ungasissumiillu pisumit kiassarneq iluatsittumik misilittagaqarfigigamikku, sulili mingutsitsinerup annikillisarnissaanut iliuuserisinnaasanik ujartuigamik.
Kim Kielsenip iliuuseriniakkatut saqqumiussaa aallaavigalugu, tusarniaanernit nalilerneqareerpat, upernaakkut inatsisartut ataatsimiinneranni saqqumiunneqassaaq.