CO2-mik imerpalasumik nunap iluanut toqqorteriniartut
Silap pissusaata allanngoriartornera unikaallatsinniarlugu Australiamiut taamatut pilersaaruteqartut, dr-imi allaaserineqarpoq.
CO2 illoqarfissuup Melbournep ungasinngisaani nunap iluanut 2 kilometerisut itissusilimmut toqqorterniarneqarpoq. Tamaani ukiualunni misissuinerit ersersippaat CO2 100.000 tonsinikannertussusilik katersorneqarsinnaassasoq.
- Pilersaarutit nutaat nunarsuarmi aatsaat taama annertutigisut pilersaarutigineqarput, Peter Cook BBC Newsimut oqarpoq.
Pilersaarutit Australiami naalakkersuisunit suliffeqarfissuarnillu tapersersorneqarput, avatangiisinillu siunissami mianerinninnerulernissaq neriuutigineqarluni.
Avatangiisinilli illersuiniaqatigiit teknologii nutaaq taanna apeqquserpaat, tassa teknologii nutaaq pillugu ilisimasat annikippallaarnerarlugit.
Aningaasat pilersaarutinut atorneqartussanngortinneqartut seqernup anorillu nukingi atorlugit nukissiuutiliornermut atorneqartariaqartut illersuiniaqatigiit piumasarivaat.
