CO2-mik decembarimi aniatitsinissaq uuttortarneqassaaq

Kuutsitsivigaluni imeq kissartoq atorlugu ullut 14-it ingerlaneranni ullut tamaasa uffartaraanni, imeq sapaatip akunnerini marlunni katillugu immaqa minnerpaamik 15.000 liiteriusoq atorneqassaaq, taava gassit silaannarmik kissakkiartortitsisartut qanoq annertutigisut pinngortarpat, ataatsimeersuarnernilu peqataasorpassuit tusindtilikkaat Sverigep kujataaniit Københavnimiillu qimuttuitsut biililluunniit limousinat atorlugit ullut tamaasa Bellacenterimukaattaraanni qanormita aniatitsisoqartigissava?

Tamakku tamarmik allarpassuillu uuttortarneqassapput naatsorsorneqarlutillu, silap pissusaata allanngoriartornera pillugu Naalagaaffiit Peqatigiit aaqqissuussaannik Bella Centerimi decembarimi ataatsimeersuartitsinissami CO2 aniatitaq katillugu qanoq annertutigissanersoq Danmarkimi Nunanut Allanut tunngassuteqartunut ministereqarfiup paasiniassammagu. Aviisimi Berlingske Tidendemi taama allaaserisaqarput. Siunnersuisarfissuaq Deloitte Nunanut Allanut tunngassuteqartunut ministereqarfiup qinnuivigisimavaa uuttortaalluni paasissutissat ajornannginnerpaamik qanoq paasiniarneqarsinnaaneri misissoqqullugit, silammi pissusaata allanngoriartornera pillugu ataatsimeersuarnissaq pernaammik pisussaavoq.

Gassit silaannarmik kissakkiartortitsisartut qanoq annertutigisut inuit ataatsimeersuaqataasut pilersissaneraat Deloittep tassa naatsorsortussanngorpaa, peqataasut akunnittarfimmiinnerminni Sjællandimilu Sverigellu kujasissuani angallanneqarnerminni CO2-mik qanoq aniatitsitigissanersut uuttortarneqassalluni.