Clinton Korea Avannarlermut iliuuseqaqqusivoq
Korea avannarliup Korea kujallermiut umiarsuaannik sorsuummik, qaammatit marluk matuma siornagut qaartartunik immap iluatigoortartunik saassutarinninnera eqqumiitsoq nunarsuarmioqatigiit iliuuseqarfigisariaqarpaat. Taama oqarpoq USA-p nunanut allanut ministeria Hillary Clinton Korea kujalliup illoqarfiisa pingaarnersaanni Seoulimi ullumi tikeraarnermini.
Hillary Clinton Korea kujalliup præsidentianik Lee Myung-bak-imik ullumi ataatsimeeqateqarpoq Koreap qeqertaasaani pissutsit najummassimanarsigaluttuinnarnerat oqaloqatigiissutiginiarlugit aammalu nammaqataanini takutinniarlugu. Korea kujalliup avannarliullu akornanni naalagaaffittut atassuteqarnerit tamarmik maanna kipitinneqarput Korea avannarlerlu sorsulivinnissamik sioorasaarilluni, nunat tamalaat nalunaarusiaanni aalajangiunneqareersorlu Korea avannarleq marsimi Korea kujallermiut sorsuutaata kivisinneqarneranut inuttallu 46-t toqunerannut pisuusoq.
Clintonip Korea avannarlermut uppernarsaatissat uppernarluartutut ullumi taavai, oqarlunilu Korea kujallermiut umiarsuaannik kivisitsineq eqqarsaatigilluakkamik akineqartariaqartoq.
- Tamanna Korea avannarliup tungaanit akeqqusaarneruvoq akuersaarneqarsinnaanngitsoq nunallu tamalaat iliuuseqarnissartik akisussaaffigalugu. FN-ip isumannaallisaanermut ataatsimiititaliaata Korea avannarlermut pillaatitut killilersuinissamik atulersitsinissaa Korea kujalliup piumasaqaatigaa, piumasaqaallu tamanna USA-p tapersersoraa Clinton oqarpoq.
- Præsident Lee-p suliniutissatut siunnersuutai eqqarsaatigilluagaapput naleqqulluinnarlutillu USA-miillu tapersersorneqarluinnarlutik.
Hillary Clinton Kinamiut atorfilittaannik pissutsit najummassimanarsinerat pillugu oqaloqatiginnikkiartorluni tikeraarluni Kinameereerluni Koreamut kujallermut tikippoq. Clinton oqarpoq Kinamiut pissutsit ilungersunarnerat paasilluarsimagaat, neriuutigiginilu Kinap ikiuunnissaa naatsorsuutigisinnaagini, Korea avannarlermiut saassussinerat pillugu nunanit tamalaani isumaqatigiileriartorneq ilutigalugu.
Kinali Korea avannarliup kisiartatut iligisaa Korea avannarliup pisuutinneqarneranut manna tikillugu iliuuseqanngilaq, taarsiulluguli Pyongyangimi aqutsisut oqaloqatiginissaat kajumissaarutigalugu.
