Clinton aamma Annan Århusimiipput
USA-p præsidenterisimasaa Bill Clinton kiisalu Naalagaaffiit Peqatigiit generalsekretærerisimasaat Kofi Annan Århusimiittumi Energy Arena-mi unnugu oqalugiartussanut ilaapput.
Naak angutit taakku marluk atorfimminnit tunuareernikuugaluartut inunnit nuannarinnitserpassuaqarput, oqalugiarfissaallu isumannaallisaasorpassuarnik unnummanna sulisoqassaaq.
USA-mi isumannaallisaanermik suliallit, Secret Service, politiillu ikigisassaanngitsut Energy Arena-p silataani iluanilu inissisimapput, tusagassiuutillu pisussamik malinnaaqqusaanngillat.
Bill Clinton-ip nulia Hillary Clinton maanna USA-mi præsidentinngorniuttunut ilaavoq, uialu Bill Clinton paarineqarnissaa pingaartinneqartorujussuanngorsimalluni. Danmarks Radio-p ilanngutassiissartua Mads Ring taama oqaluttuarpoq.
Oqalugiartussanik tusarnaariarniarneq akikitsuinnaanngilaq, ilami billet-i ataaseq 1500 koruuneqartussaagami.
Bill Clinton aamma Kofi Annan Skandinaviami ulluni makkunani angalapput, oqalugiarnissaallu katillugit sisamaallutik.
Oqalugiaqattaarnerit ippassaq aallarnerneqarput, Norge-p avannarpasinnerusortaani Tromsø-mi oqalugiartoqarmat.