Climagate naggaserneqarallarpoq

Suliaq tassani pineqartoq tassaavoq ukiuni 13-ini qarasaasiakkut allagaasarsimasut unioqqutitsisumik ammarneqarlutik saqqummiunneqarmata, silallu pissusaata allanngornerata peqqutaanik assortuisut uppernarsillugu oqaatigivaat nunarsuup kissakkiartornerani paasissutissat pingaarutillit ilisimatuunit isertuunneqarsimasut.

- Piaaraluni isertuussisoqarsimanngilaq eqqunngitsumilluunniit iliortoqarsimanani, Londonimi pisortanit ataatsimiititaliarsuaq taama inerniliivoq.

Climagate qarasaasiakkut allakkat tusintinit amerlanerit qarasaasiamut unioqqutitsillutik isertunit saqqummiunneqarmatali oqallinnersuaq aallartippoq.

Silap pissusaata allanngornerata peqqutaanik assortuisut tamanna ilisimatusarnermi inernernit salloqittaanermik uppernarsaatitut isigaat, ullumilu nalunaarusiaq ukiup affaata ingerlanerinnaani nalunaarusiat pingajoraat.

- Pingasunik nalunaarusiortoqarnera immikkuualuttut tamakkernissaannik peqquteqarpoq, taamaammat parlamentimi atorfillit kiisalu ilisimatuut Royal Sociatymeersut ilanngunneqarpoq, parlamentimi ataatsimiitaliarsuarmi aqutsisoq Phil Willis oqarpoq.

Nalunaarusiaq ullumi saqqummiunneqartoq ilisimatuunut nunarsuullu kissakkiartorneranut inuit pisuunerarlugit oqaluttunut ajugaanertut isigineqarsinnaavoq. Taakku tutsuviginassusaat aapeqqusersorneqaleraluarsimavoq, ilisimatuulli ilisimatuunullu akerlilersuisut akunnerminni ima isumaqatigiinngitsigaat suliaq tamaannga killikkannarani.

- Periaatsit atorneqarsimasut sukumiisuunngimmata tatiginngilavut, soorlu ilisimatuunik akerlilersuisut naammattumik apersorneqarneq ajorput, taamaammat suli isertuussisoqarnissaa ernummatigaarput, ilisimatuunut akerlilersuisoq Steve McCintire oqarpoq.

Silap allanngorneranut inuit pisuusut pillugit isumasiunerit kingulliit takutippaat nunarsuup kissakkiartornera inunnik peqquteqartoq ilisimatuut 98 procentiisa ilimagingaat.

Inuilli qanoq pisuutiginersut suli assortuussutaavoq.