Claus Hjort Frederiksen nunatsinni aningaasartungaatsiartarsimavoq

Aviisip Danmarkimi ullormut saqqummersartup Ekstra Bladet-p Claus Hjort Frederiksenip ministeriunermini aningaasat atugai mississoqqammerpai, taakkulu takutippaat ministeritut aningaasanik akiliutigisartakkani Kalaallit Nunaani atorluartarsimagaa.

Claus Hjort Frederiksen atorfilittaalu arfinillit nunatsinnut 2006-imi angalanerminni ilaatigut Kangerlussuarmi umimmannik takornariarsimapput, Ilulissaniinnerminni sermersuup iigartarfia angallammik takornariarsimavaat, soorluttaaq qulimiguulik atorlugu sermersuaq tutiartorsimagaat.

Taakkuinnaanngillalli. Nunaqarfinnut aamma angalasimapput kiisalu inuit 14-it nerersuartinneqarsimallutik, katillugit 10.000 koruuninik nalilimmik.

Ministeri Nuummiitillutik aamma neriniartarfimmi Nipisami qaaqqusisimavoq, 8.000 koruuninik akilimmik nerrissimallutik, kingorna imerniartarfimmut nangikkiaasimapput, tassanilu 5.000 koruunit atorsimallugit, taakku ilaatigut kalaallit kaffeannik taagukkanut 13-inut immikkut 130 koruuninik akilinnut aamma akiliisimalluni. Grønlandsk kaffe tassaavoq kaffi Whiskey-mik, Kahlua-mik aamma Grand Marnier-imik kiisalu immummik qappersitamik akulik.