Claus Haagen Jensen: Iliuuserineqartut inatsisitigut unioqqutitsinerupput
Kalaallit Nunaanni politikerit atorfilittaallu akikinaakkanik unioqqutitsillutik illuutitaartorput. Taama oqariartuutilimmik TVA-isimi ippassaq ilanngutassiisoqarpoq.
Jørgen Wæver Johansen
oktobarip 22-at 2007 08:18
- Paasinninnera naapertorlugu Kalaallit Nunaanni iliuuserineqartut inatsisitigut unioqqutitsinerupput, Claus Haagen Jensen Aalborgip Universitetianeersoq oqarpoq.
Pineqartut tassaapput Namminersornerullutik Oqartussat illuutassa politikerinut atorfilittaanullu tunineqarnerannut tunngasumik suliaq.
Ineqarnermut naalakkersuisuusimasut Johan Lund Olsen aamma Jørgen Wæver Johansen ilangutassiami apersorneqarputtaaq.
Johan Lund Olsenip nuliatalu illortik 680.000 koruunilerlugu pisiaraat, uffa naliliisartut 2 millioni koruunilittut nalileraat.
Ineqarnermut naalakkersuisuusimasup Jørgen Wæver Johansenip illua 1,5 millioni koruuninut nalilerneqartoq affaannarmik akilerlugu, 730.000 koruunilerlugu, tunineqarpoq.
