Demokraatit qinigaarujussuarput naalakkersuisooqataassagunillu piumasaqaateqarlutik
KNR-ip tv-kkut ilanngutassiortuata Demokraatit siulittaasuat Randi Vestergaard Evaldsen Demokraatit Nuummi katersuuffigisaanni Godthåb Bryghusimi unnuap qeqqata sioqqutilaaraa naapimmagu, najuuttut hurraartuupput, nipilersortoqarpoq nuannattoqarlunilu.
Akunneri arlaqanngitsut qaangiummata qinersinerullu inernera inaarutaasoq piariilermat partiillu siuttuisa ileqquusumik apeqqarissaarfigineqartussanngormata nuannaarneq millisimanngilaq.
- Nuannaartorujussuuvunga aamma tulluusimaartorujussuuvunga. Uani takutiinnarpaa, partiitta iluani qanoq ataqatigiissimanersugut taavalu qanoq nukittutigisumik immitsinnut kaammattorsimanersugut, Randi Vestergaard Evaldsen oqarpoq.
AAMMA ATUARUK Aleqa Hammond Inatsisartunut ilaasortanngunngitsoq
Qinersinerup inernerata inaarutaasup takutippaa Demokraatit 5173-inik taaguunneqartut partiilu inatsisartunut qinersinerni tulleriinni marlunni siuariaqqittoq.
Demokraatit ilaasortaatitaat marlunnik ilapput taamaalillutillu Inatsisartuni arfinilinnik ilaasortaqalerlutik.
Tamannalu sunniuteqaqataanissamut periarfissiivoq Randi Vestergaard Evaldsenillu naalakkersuisooqatiinnut peqataanissaq piareersimaffigaa, tamannali piumasaqaatitaqarpoq.
- Apeqqutaalluinnarpoq, piumasaqativut naammassineqarsinaanersut. Naammassineqarsinaassappata, eqqartuinerit aallartikkumaarput.
- Piumasaqaaatitta ilagivaat kalaallit nunatsini sulisartut namminneq oorisiamik annertunerpaartaat namminneq kaasarfimmiugarilisagaat.
Randi Vestergaard Evaldsen naapertorlugu siuariaateqarnertik partiip piffissami sivisuumi pilersaarummik malitaqarsimanerannik pissuteqarpoq.
- Partiitta iluani sulilluartorujussuuvugut immitsinnullu tapersersuinnaavissimalluta. PArtiitta iluani ataqatigiinnerput sakkortoorujussuuvoq, massakkullu inernerusumut taanna tunngaviusorujussuuvoq. Aammalu qineqqusaartitatta tunniussaat annertoorujussuit uani malunniutaapput, taakkualu takussutissiiginnarput inernerani, Randi Vestergaard Evaldsen oqarpoq.
AAMMA ATUARUK Siumup ajugaanera Olsvigip nassuerutigaa
Partiilli sassartitaata ilaat amerlasuupilussuarnik aamma taaguunneqarpoq. Niels Thomsen 2710-nik taaguunneqarluni taasinerpassuit qulakkeerpai.
- Nielsi partiitta iluani sunniuteqartorujussuuvoq. Aamma uani takussutissiiginnarpoq, nunatta Nielsitut ittoq pisariaqartikkaa. Inuk angusaqarusuttoq aammalu nukittorujussuarmik oqariartuutilik.
Demokraatit qinersinermi angusaat 2007-imiilli aatsaat taama kusanartigivoq.