Cirkusip nunatta Isiginnaartitsisarfia aningaasanik katersuiniukkaa

Nuummi ukioq-manna aggustip naalernerani cirkusfestivalertoqarnissaa matumani aallaaviuvoq.

Cirkusimi isiginnaartitsisartut 20-t 30-llu missaanniittut, annerusumik Skandinaviameersut, Nuummi aaqqissuussami isiginnaartitsersuaassapput, Nuummi Aliikkusersuisartut Isiginnaartitsissartullu Peqatigiiffiat, N.A.I.P, Nuummi inuusuttut siuarsartut (Nuuk Ungdom i Fremdrift), NUiF, Nuummi nipilersortartoqatigiit, Nuuk Byorkester, aamma Nunatta Isiginnaartitsisarfia, Nunattalu Isiginnaartitsinermik Ilinnarfia aamma aaqqissueqataassallutik.

Nunatta Isiginnaartitsisarfiani qullilersornermut atortut pitsaanerulersinniarlugit, klovni Sverigemeersoq Nalle katersuinialersimavoq. Cirkusfestivali EU-mit aningaasalersorneqarsimavoq, klovnilu taanna cirkusimi isiginnaartitsinissamik kalaallinik siornatigut ilinniartitsinikuulluni.

Cirkusimik isiginnaartitsisartut atortutik Nunatsinnut assartortussaavaat, containerit atorlugit assartuisoqassalluni. Nunatsinnilu isiginnaartitsisarnerup piorsaavigineqarsinnaanissaa siunertaralugu, klovni Nalle nittartakkatigut attaveqaatitigut Facebookikkut Europami isiginnaartitsisarfinnut tamanut kajumissaaruteqarpoq, qullilersuinermut atortunik tunissuteqarnissaat kajumissaarutigalugu.

- Kalaallit Nunaanni isiginnaartitsisarfik, Nunatta Isiginnaartitsisarfia, aallarteqqammerpoq, Kalaallit Nunaanni isiginnaartitsinermik ineriartortitsilluarluni. Ineriartortitsinerli iluatsilluassappat qullilersuutinut atatillugu atortunik nutaanik amigaateqarpoq, taamaammat atortunik taakkuninnga sinneqartoorsimassagussi kammalaatsitsinnut tunniussisinnaavusi, klovni Sverigemeersoq, Nalle, Facebookikkut ilaatigut allappoq.

Tunissuteqartoqareersorlu, Facebookimi quppernermi tassani ilaatigut takuneqarsinnaavoq.

Tuinissutigineqarsimasulli suunersut, aggustimi paasinarsiumaarpoq, Nunatsinni isiginnaartitsinikkut aaqqissuussat annersaasa ilaat ammarneqarpat paasinarsiumaarluni