Cimber Sterling Nunatsinnut timmisartuussisalernavianngilaq

Aalborgip Kangerlussuullu akornanni aasaq manna angallassisoqarnavianngilaq:

- Ilumoorpoq Danmarkip Kalaallit Nunaatalu akornanni silaannakkut angallassisalernissamik eqqarsaatersoraluaratta. Ukioq mannali taamaaliornavianngilagut, Cimber Sterlingimi tusagassiinermut pisortaq Signe Thorup oqarpoq.

Air Greenland Cimber Sterlingilu suleqatigiinnissamut isumaqatigiissummik atsioqatigiissinnaasimanngillat.

Tamanna pissutaalluni nunap iluani angallassinermut atatillugu ajornartorsiuterpassuaqarsinnaassagaluarpoq.

Kalaallit Nunaata Danmarkillu akornanni angallassisalernissaq Cimber Sterlingip taamaammat taamaatiinnarallarpaa, Signe Thorup oqarpoq:

- Ukiup ingerlanerani angallassisalersinnaanissarput neriuutigigaluarparput, Air Greenlandimillu isumaqatigiissusiorsinnaanissarput aamma neriuutigigaluarlutigu. Ilaasugut Kalaallit Nunaannut tikikkaangamik ajornannginnerusumik illoqarfinnut allanut ingerlariaqqissinnaassagaluarput isumaqatigiissusiorsinnaagaluarutta. Suleqatigiinnissarli piviusunngorsinnaasimanngilaq, Signe Thorup oqarpoq.

Taasssuma oqaatigaa Air Greenlandip tamanna ajornarsisikkaa. Kalaallit Nunaannut angallassisalernissaq pillugu Cimber Sterlingip pilersaaruteqarnera, inuussutissarsiorneq pillugu Nuummi siorna aggustimi isumasioqatigiittoqarmat saqqummiunneqarpoq.