CIAp timmisartuussisarneri sammineqaqqilerput
Amerikamiut ajuusaarutigaat, tuluit silaannartaat mittarfiilu pillakkanik angallassinerni oqallisaaqisuni, atuisarsimannginnerminnik siusinnerusukkut tuluit nalunaarfigisimagaluaramikkik.
- Paasissutissat ingerlateqqinneqarneranni ajoraluartumik kukkusoqarsimavoq, Amerikamiut oqaaseqartitaat ullumi oqarpoq.
USA-p nunanut allanut ministeria Condoleezza Rice ippassaq Tuluit nunanut allanut ministeriannut David Miliband-imut utoqqatserluni sianerpoq, tamannalu Tuluit ministeriunerata Gordon Brownip ”ilungersunartutut” oqaatigaa.
- Taama pisoqarsimanera aamma pisimasoq ilisimasaqarfiginnginnatsigu pakatsissutigaara. Maanna suliamik ingerlatsinissamut periaatsimik pilersitsissaagut, taama pisoqaqqinnginnissaa anguniarlugu, Gordon Brown Bruxellesimi tusagassiortunik katersuutsitsinermi oqarpoq.
Matumani pineqartut tassaapput, CIA-p timmisartui marluk – tamarmik immikkut peqqarniisaarniatut pasisamik ataatsimik ilaasoqartut – 2002-mi orsersorniarlutik qeqertamut aqqusaarsimasut.
CIA-p timmisartui peqqarniisaarniatut pasisanik angallassinerminni, Danmarkimi Kalaallit Nunaannilu mittarfeqarfinnik atuisarsimanersut Danmarkimi naalakkersuisunit misissuiffigineqaleruttorpoq.
