CIA-p timmisartuussisarsimanera misissuiffigeqqissaarneqaqqulerpaa
- Nunatsinni partiit tamarmiullutik piumasaqaatiginikuuaat danskit naalakkersuisuinut piumasaqassasugut, pisimasut pillugit misissueqqissaartoqassasoq, naalakkersuisut avataanninngaanniit misissuititanik, taannalu piumasaqaat naalakkersuisuninngaanniit ullumi akuersaarparput, Kuupik Kleist oqarpoq nassuiaallunilu Naalakkersuisut, partiit tamarmiullutik misissueqqissaartitsinissamik piumasaqarsimanerat tusaanngitsuusaarneqarsinnaanngimmat aamma inatsisartuni oqaloqatigeeqattaarnerit tunngavigalugit, Naalakkersuisut taama aalajangersimasut.
Nangillunilu oqaatigaa danskit nalakkersuisuinut saaffiginnissut, Naalakkersuisut peqatigalugit ulluni tullerni suliarissagitsik, tassungalu atatillugu inatsisartut sillimaniarnermut ataatsimiititaliaanni ilaasortat aamma oqaloqatigineqarumaartut. Tamatuma kingorna saaffiginnissut danskit naalakkersuisuinut apuunneqassasoq, naalakkersuisup siulittaasuata oqaatigaa.
- Tassannganniillu tassa qanoq akissuteqarumaarnersut utaqqisariaqassavarput isumartik allanngortillugu akuersaarumanersut imaluunniit misissuisoqarnissaanik naameereernikuunertik attatiinnassaneraat. Aalajangiiniarniarnerup sivisusimanera Naalakkersuisut siulittaasuata, Kuupik Kleistip ilaatigut ima nassuiaateqarfigaa:
- Naalakkersuisunut pingaaruteqarsimavoq ukiuni qaangiuttuni suliassaq pillugu qanoq pisoqarsimanera misissoqqissallugu. Nunatsinniit isummersuutaasarsimasut piffissap ingerlanerani qanoq ittuunersut aamma uterfigeqqittariaqarsimavavut. Tamakkualu nalilersoqqittariaqarneri aamma Naalakkersuisuni marlussoriarluta nangittumik oqaluuserisariaqaqqittarsimallugit. Aammalu inatsisartut nunamut sillimaniarnermut ataatsimiititaliaat aamma oqaloqatigisaqattaarsimallutigu. Taamaammat piffissaq pisariaqartittarsimavarput eqqarsaqqissaarnissamut aammalu misissueqqinnissamut. Kuupik Kleist oqarpoq, pineqartumilu apeqqut pingaarnerpaaq tassaanerarpaa Kalaallit nunaata Danmarkillu akornanni tatigeqatigiinneq:
- Uani pineqartoq apeqqut pingaarnerpaaq tassaavoq nunatsinni oqartussaasut taavalu Danmarkimi oqartussaasut akornanni tatigeqatigiinnerup qanoq patajaatsiginera aammalu pissutissaqarnersoq sillimaniarnikkut naalakkersuinikkut ingerlatsinermi nunatsinninngaanniit danskit naalakkersuisuisa ingerlatsinerat tatigiunnaassallugu pissutissaqarnersoq. Naggataatigut taanna isummerfiusussaassooq, Naalakkersuisut siulittaasuat Kuupik Kleist naggasiivoq.
