CIA-p angallassineri: Kiap, suna qangalu pisoq nalunngilaa?
Ministereqarfiit arlallit suleqatigiiffiata nalunaarusiaq suliarileruttorpaa. Nalunaarusiami tassani tigusanik angallassinerit tamarmik allassimatinniarneqarput, kiap, suna qangalu pisoq nalunaarsorneqassallutik.
Danmarkimi nunanut allanut ministeri Per Stig Møller erseqqissaavoq Folketingip nunanut allanut tunngasuni ataatsimiititaliaata apeqquteqaataanut akissuteqaammi namminneq paasisimagitsik, CIA-p timmisartunik nalinginnaasunik atorluni tigusanik timmisartuussisarsimasoq.
CIA-p timmisartuutaata, Gulfstream III-p, Kalaallit Nunaat ukioq 2004-mi maajip ulluisa 29-anni ualikkut qulaappaa. Timmisartoq taanna USA-minngaaniit ingerlaarpoq, ilaasoraalu tyskeq, Khaled El-Masri, CIA-mit qaammatini tallimani tigusaaqqasimasoq. Angut taanna Makedoniamiit 2003-mi ukiutoqqami aallarussaavoq. Angut naalliutserujussuariarlugu Afghanistanimi tiguakkat inaannukaanneqarpoq, kingornalu paasineqarpoq paatsoornikkut tigusaasimasoq. Taamaammat CIA-p timmisartuata Albaniamukaappaa, tamaanilu niullugu. CIA-p timmisartua Albaniamiit Sarajevo aqqusaarlugu Prag-iliarpoq, tamaanngaaniit Islandimi Keflavik-imut, Kalaallit Nunaallu qulaallugu Washingtonimut uterluni.
Tigusanik timmisartuussinerit siusinnerusukkut pisimasut allat timmisartup taassuma assiginngilai. Bosnien-Hercegovina qulaakkamiuk tassaavoq Naalagaaffeqatigiit isertortumik paasiniaasartuisa, CIA-p, timmisartuutaa, tassa naalagaaffimmit akuerisaalluni angalasoq, Kalaallit Nunaalli qulaakkamiuk aamma taamaassimanerpa? Tamanna Danmarkimi naalakkersuisunit suli akineqanngilaq, tassa timmisartoq Kalaallit Nunaata silaannartaatigoornissaminut akuerisaasimanersoq, imaluunniit naami.
Danmarkimi nunanut allanut ministeri, Per Stig Møller, aviisimut Jyllands-Posten-imut oqaaseqarumanngilaq, CIA-lli timmisartuussisarneri pillugit misissuinernut maanna pisunut innersuussivoq, misissuinerlugooq qaammatip tulliani naammassisussaavoq.
Naalliutsitsisarneq pillugu ilisimatooq, Naalagaaffiit Peqatigiinni atorfilik, Manfred Nowak, Kalaallit Nunaannut Danmarkimullu sapaatip akunnerani qaangiuttumi tikeraaqqammersoq, Radioavisimut oqarpoq, CIA-p timmisartuussisarnerisa sumulluunniit attuumassuteqanngitsumit misissuiffigineqarnissaat tapersersorini.
