Christianiap siunissaa aalajangerneqarpoq

Christianiap Københavnimi illoqarfiup ilaatut nalinginnaasutut inissisimalernissaa Christianiami innuttaasut akueraat.

Christianiap Daanmarkip sinneratulli ingerlalernissaa naalagaaffiup kissaatigaa, ippassarlu unnukkut ataatsimiittoqarmat isumaqatigiittoqarpoq. Ataatsimiinneq ullaakkut tallimat tungaanut ingerlanneqarpoq.

Christianiamiulli naalagaaffimmik eqqartuussisulersuussinerat unitsiinnarneqanngitsoq, Christianiap eqqartuussisuserisuata Knud Foldschackip oqaatigaa.

Naalagaaffimmik eqqartuussisulersuussinerit katillugit 700-t missaanniipput.

Naalagaaffiup kissaataa taamaalinikkut eqquutsinneqanngilaq. Christianiami innuttat naalagaaffimmik eqqartuussisulersuussinerat taamaatiinnarneqarnissaa naalagaaffiup piumasaraa, apriilillu aallaqqaataatinnagu tamanna pisussaasimagaluarpoq.

Christianiamik inuusuttullu ornittagaannik Jagtvej 69-imiissimasumik tapersersuisut 10.000-it missaanniittut eqqissisimasumik Københavnimi ullumi ingerlaaqatigiipput, unnugulu Vestre Fængselip eqqaani naassalluni.

Inuusuttut arlallit Vestre Fængselimi suli parnaarussimapput.