Christianiami inuit 18-it tigusaapput
Ujaqqanik politiit tungaannut millooreerlutik qaartitsisaqattaareerlutillu inuit 18-it Christianiami ullumi tigusaapput, aviisimi Politikenimi taama allaaserinnittoqarpoq.
juunip 18-at 2008 17:16
Tigusaasut marluk 14-iinnarnik ukioqarput, politiillu oqarput allaat meeqqat aqqaneq-marlunnik ukiullit eqqissiviillornerni peqataasimasut.
Politiit pisarnertik malillugu Christianiamut ulloqeqqata missaani misissuiartornerisa nalaani eqqissiviilliornerit aallartipput. Takkummata qaartitsivigineqaqattaalerput, eqqissiviilliornerillu ualiartornerani sakkortusiartorput.
Tigusaasunit pingasut politiinut sakkortuuliorsimasutut, parnaarussaanissaallu siunertaralugu, inatsit tunngaviusoq naapertorlugu aqagu killisiorneqassapput. Tigusaasut sinneri, aviisi Politiken naapertorlugu, iperagaassagunarput.
Ullut pingasut ingerlaneranni aappassaa Christianiami eqqissiviilliortoqarpoq.
