Chresten Sørensen: Piffissaagallartigu sukaterisoqartariaqarpoq
Taanna aamma oqarpoq, Alcoap alumiiniumik aatsitsiviliornissaata qanoq aaqqissuussaanissaanik aalajangiussineq ullumikkut aningaasatigut sipaarutaasinnaasoq.
- Qanoq ittumik akuersissuteqarnissaq qularnanngilaq Kalaallit Nunaannut ernumanartoqarsinnaammat. Aamma aningaasartuutit amerlangaatsiarsinnaassapput, akuersissuteqarnermi akileraarut alumiiniup akianut naleqqussarneqanngippat imaluunniit alumiiniumik aatsitsiviup sinneqartoorutaannut naleqqussarneqanngippat, Chresten Sørensen oqarpoq.
Taanna aperineqarami ullumikkut nunarsuatsinni aningaasarsiornikkut ajornartorsiorneq eqqarsaatigalugu Kalaallit Nunaanni qanoq malugineqarsinnaanersoq, akilluni oqarpoq, nunarsuarmi aningaasarsiornikkut ajornartorsiornermi Kalaallit Nunaata eqqugaanissaa ilimaginagu. Tassami alumiiniumik aatsitsiviliornissamik pilersaarutit aningaasarsiornikkut ajornartorsiortoqalinngikkallarneratulli iinnarmata. Aluminiumimmi aatsitsiviup Kalaallit Nunaanni inissinniarneranut nunarsuatsinni nukissiuuteqarnikkut aningaasartuutit qaffasinnerujussuat patsisaammat. Maannakkullu nunarsuatsinni nukissiuuteqarnikkut aningaasartuutit suli qaffaseqimmata.
Aamma tamatumunnga patsisaavoq, pilersaarut sivisuumik pilersaarusiugassaammat, ingerlaannarmi aallartittussatut pilersaarusiugaanngimmat.
- Taamaattumik isumaqarpunga aningaasaliiffigineqarnissaa suli tunuarterfigineqanngitsoq. Tassami ikummatissat uuliameersut aamarsuarneersullu, C02-mik aniatitsisut, akileraaruserneqartalernissaat Alcoamit eqqumaffigeqqissaarneqarmat.
Chresten Sørensen aperineqarpoq, nunatta karsiata 2009-mi amigartoorutissai 441 miliuunit koruuninit 675 miliuunit koruuninut amerlassuseqarnissaat naatsorsuutigineqamat tamanna ernumanartoqartinneraa.
- Aningaasarsiornikkut ingerlatsinerup sukateriffigineqarnissaa pingaartuuvoq, tassami Islandimiut assigalugit aningaasaq nalikilliartupiluulersinnaammmat. Taamami pisoqarpat inuutissarsiutit pingaarnersaat aalisarneq atugarliortinneqalersinnaammat, Chresten Sørensen naggasiivoq.
