Chilemi persuarsiuleruttortut nuna sajoqqippoq
Nunap sajunnera alla Richterip uuttuutaa malillugu 7,2-uvoq præsidentinngortitsinermilu peqataasut amerlaqisut persuarsiornerup nalaani nunap sajuallattarnerinit allanit, inunnilli toqusoqarfiugunanngitsunit annilaartitaasutut isikkoqarlutik.
Konservativiusoq milliardinik aningaasaatilik Sebastian Piñera præsidentinngorpoq siornatigut præsidentiusimasoq socialdemokratiusoq Michelle Bachelet kingoraarlugu.
Sapaatilli akunnerata siuliani nunap sajunnera politikkikkut suleqatigiinnik qanilleriartitsivoq, pinngortitami ajunaarnerup kingornagut ajornartorsiutit taakkua peqatigiillutik aaqqinniarmatigik.
Piñerap januaarip qiteqqunnerani præsidentissarsiornermi ajugaanera taama nipeqarpoq.
Piñera pinerluttut sakkortunerusumik pillagaasalernissaannik, aningaasarsiornerlu siuarsarniarlugu suliffeqarfiit tulluarnerusumik akileraarutitigut akiliisalernissaannik neriorsuuteqarnermigut qinigaavoq. Januaarimili ullut nuannaarfiusut qaangiummatali nunami amilukujoorsuarmi tassani nunap ataani pisoqarpoq. Januaarip 27-anni nunap sajunnerani kamanaatsumi illoqarfik Conceptión, aammattaarli Piñerap politikkikkut oqaluuserisassai nuunneqarput. Piñera nalunaarpoq maannakkut sammineqartussat tassaasut ajunaarnermi aserukkat iluarsaqqinneqarnissaat oqaasinnaaminullu ilaliullugu oqarluni: Siunissami naalakkersuinerput nunap sajunneranisut politikkiunani iluarsaaqqinnermik politikkiussaaq. Taanna aamma oqarpoq kikkut tamarmik atorfissaqartinneqartut, Chilemiullu tamarmik ataatsimuussasut. Kajumissaarinerlu tamanna arnap præsidentiusimasup demokratiusullu Michelle Bachelet-p aammattaarlu Chilep oqaluttuarisaanerani præsidentiusarsimasunit nuannarineqarnerpaasunut ilaasup malippaa:
- Uummatikkut ilumoorlunga ikiortigineqarsinnaavunga arlaatigut iluaqutaasinnaassaguma, Bachelet nunap sajunneranit ajoqusikkat qimerlooreerlugillu taama oqarpoq. Præsidentinngortussallu Piñerap oqaasinnaavi isumassarsiorfigissagaanni oqartoqarsinnaavoq nuna sajuppillatsinneqartoq, nunalli politikerii ataatsimoorlutik sajuppillassimasut. DR ilanngutassiivoq.
