Chile nutaamik præsidenteqalissaaq
6,2 milliardit koruuninik aningaasaateqarpoq, Forbesillu tulleriiaarinera najoqqutarissagaanni tassaalluni nunarsuatsinni pisuunerpaani normu 701. Maannalu Amerikami Kujallermi nunamut Chilemut præsidentitut imminut taasinnaalerluni.
60-inik ukiullip Sebastian Piñerap niuernikkut suliani pingaarnerutinnagit, Amerikami Kujallermi naalagaaffiit aningaasarsiornikkut aalajaannersaannik aallussiniarluni, qinigaanermi kingorna neriorsuutigaa.
- Suliffeqarfiutima ilaat tuniniarpakka, tatigineqarneralu naapertorlugu tassaarusullunga præsidenti pitsaasoq, ajugaanermi kingorna Piñera oqarpoq.
Piñerap ilaatigut Chilemi fjernsynikkut aallakaatitsivinnik sisamanik pigisaqarpoq. Pisuussuterpassui pissutigalugit, akerlilersortaasa taasarpaat "Chilep Silvio Berlusconia", matumani Italiap ministeriunera tusagassiuutinillu pigisalik eqqarsaatigineqarpoq.
Piñerap ajugaaneratigut Chilemi partiit qiterliunerusut saamerliunerusullu ukiuni 20-ni naalakkersuisuunerat taamaatinneqarpoq.