Nakorsat qullersaat suleqatigiissinnaannginneq pissutigalugu suliunnaartussaasoq
Suleqatigiinni ajornartorsiuteqarneq pissutigalugu suliunnaarpoq, peqqinnissaqarfiup qullersaqarfianit taama nalunaaruteqartoqarpoq.
Assia Brandrup-Lakanow siorna aasakkut atorfinimmat nuannaarutigineqarpoq:
- Ilinniagaqassutsikkut piginnaaneqarluartuuvoq suliffeqarfinnullu politikkikkut aqunneqartunut piginnaaneqarnermigut inerisaarusussuseqarnermigullu napparsimasut sulisullu ajunngitsumik atugaqarnissaat qitiutillugu peqqinnissaqarfiup inerisartuarneqarnissaanut pitsaasumik tunniussassaqassaaq, Malene Marie Nielsen Aqutsisoqarfimmi pisortaq siorna aasakkut taama oqarpoq.
Peqqinnissaqarfimmi sulisut peqqissutsimut aqutsisoqarfiata pisortaanit sapaatip akunnerani kingullermi tallimanngornikkut mailikkut allaffigineqarput, Assia Brandrup qaammatit arfineq marluk atorfeqareerluni, Peqqissutsimut Aqutsisoqarfimmi atorfeqarunnaartoq.
AAMMA ATUARUK Peqqinnissaqarfik nakorsatut qullersartaarpoq
Peqqissutsimut aqutsisoqarfik peqqinnissaqarfimmi qullersaqarfiuvoq.
- Peqqissutsimut aqutsisoqarfiup tamanna ajuusaarutigaa, akuerisariaqarluguli, aqutsisoqatigiit suleqatigiissinnaasimannginnerat nassuerutigaat, aqutsisoqarfimmi pisortaq Malene Nielsen peqqinnisssaqarfimmi sulisunut taama allappoq.
Assia Brandrup nakorsatut aamma tarnip pissusaanik immikkut ilinniagaqarpoq, naalagaaffiit peqatigiit peqqinnissamut immikkortortaqarfiani WHO-mi aamma Københavnip universiteani ukiuni arlalinni atorfeqarsimalluni.
Aqutsisoqarfiup pisortaa Malene M. Nielsen nakorsat qullersaata suliunnaarnera pillugu KNR-imit aperiniarneqarsimagaluarpoq, peqqinnissaqarfiulli paasissutissiisarfianit nalunaarutigineqarpoq, inunnut ataasikkaanut tunngassuteqarmat annerusumik oqaaseqarfigineqarsinnaanngitsoq.
Assia Brandrup pisortatigoortumik februarip 28-ani suliunnaassaaq. Taassuma tungaanut sulliffimmini suliunnaarsinneqarallarpoq.
AAMMA ATUARUK Cheflæge: Stor udskiftning af læger er ikke tilfredsstillende
