Charlotte Ludvigsenip Saviminilerinermik Ilinniarfik Nuummiittoq iperarumanngilaa: Taarsiullugu Sisimiuni nutamik ilinniarfiliorniaritsi

Nuummi Savimilerinermik Ilinniarfik attornagu, Sisimiuni nutaamik sanagitsi.

Kommuneqarfik Sermersuumi borgmesteri Charlotte Ludvigsen Inuit Ataqatigiinneersoq taama isumaqarpoq.

Ilinniarfik pillugu oqallinneq aallateqqippoq ilinniarfiup Nuummiit Sisimiunut nuunnissannut pilersaarut Naalakkersuisut aalajangiusimaannarmassuk.

Ilinniartitaanermut, kultureqarnermut, timersornermut aamma ilageeqarnermut Naalakkersuisup Peter Olsenip (IA) ilinniarfiup nuunnissaata qanoq akeqarnissaa aamma qaqugu periarfissaqassanersoq massakkut misissorpaa.

Akerlianilli Kommuneqarfik Sermersuumi borgmesteri isumaqarpoq ”Sisimiuni ilinniarfiit ilaneqarnissaannik isumassarsiaq eqqarsaataavoq pitsaalluinnartoq, tamatumali Nuummi matusinissatsinnik kinguneqarnissaa isumatusaarnerunngilaq.”

AAMMA ATUARUK Naalakkersuisut: Saviminilerinermik Ilinniarfik Sisimiunut nuussaaq

Nuummi Sisimiunilu Saviminilerinermik Ilinniarfeqarnissamut tunngavilersuutigaa biililerisut innaallagisserisullu amerlanerit Kalaallit Nunaanni ilinniartinneqarsinnaasut. Taamaattummi amigaataapput.

Kommuneqarfik Sermersuup nittartagaani ima allappoq:

- Oqarnittut assassorlutik sulisut nunatsinni maani amigaataanerat annertuvoq aammalu Saviminilerinermut Ilinniarfimmi inuusuttunik, siunissami akissarsiagissaalertussanik ilinniartitsisarpoq.

- Isumaqarpunga ilinniarfimmik nuutsineq eqqortuunngitsoq. Taarsiullugu ilinniarfimmik allamik ammaanissaq suliffissatsialannik amerlanerusunik pilersitsiffiussaaq sulisinnaasunillu peqarnissaq nukittorsaavigineqassalluni.

Sulisut Nuuk iluarisimaarpaat uninngaannarusunnerullutillu 

Jens Peter Jensen, ilinniarfimmi immamut tunngasuni qamuteralannullu ilinniarnermi ilinniartitsisoq, naapertorlugu ilinniarfimmi sulisunut massakkut nuannerpallaanngilaq. Tassami suleqatinilu paaserusuppaat ilinniarfik qaqugu matussanersoq.

- Sammisaq qaqinneqaqqimmat toqqissisimananngilaq, oqarpoq.

- Tamanna pilersaarutaappat, taava oqaritsi qaqugu matuneqassanersoq, taasuma tungaanut eqqissilluta suliniassaagut.

Jens Peter Jensen sulisullu allat arlallit Sisimiunut nuukkusunngillat sulinertiullu tassani nangillugu ullut ilaanni tassunga nuussagaluarpat. 

- Maani ilinniarfik matuneqassappat, taava uagut ukiorpassuarni maani sulisuusugut sumukassagut?

- Eqqarsartalerpunga immaqa nutaamik sulifittaarnissara pisariaqartoq, takkuutoqariataassappat. Suleqatikka aamma oqartartut tusaasarpakka.  

Ilinniarfimmi sulisunut sinniisup Hanseeraq Kleemannip Jens Peter Jensen tapersersorpaa. 

- Imaanngilaq Sisimiut iluaagigipput, kisianni maani sulisut amerlasuut assersuutigalugu allaniit tikipput maanilu najugaqarnertik sungiusimalersimallugu. Sulisut assersuutigalugu angerlarsimaffeqarput, umiatsiaqarltuik, meeraqarlutik ilaqutaqarlutillu, tamakkulu tamarmik imaaliallaannaq nuutinneqarsinnanngillat.

Ilinniarfiup Sisimiunut nuunneqarnissaanut teknikikkut ilinniarnerit allat ilagilernissaat iluaqutaassannginnami?

- Immaqami taama oqartoqarsinnaavoq. Kisianni soormi ilinniarfik una nutarteraanni? Maani ilinniarfiup nutarternisssaa imminut akilersinnaanerussaaq, atortut amerlanersaat maaneereermata ilinniartitsinerlu ingerlalluaqaluni, Hanseeraq Kleemann oqarpoq. 

- Imaassinnaavoq Sisimiuni inuit ilaannut suliffeqalernissaq iluassasoq, kisianni suliffissanik pilersitsinerunngilaq maani sulisut arlallit suliffitsik annaassapassuk.