Champix pillugit mianersoqqussut

Iisartakkat ukiuni marlungajanni nakorsaasiorfinnit pineqarsinnaasimasoq nikallungarujussuarnermik allaallu imminut toqunnissamik eqqarsalersitsisarnermik, atuisumut pilersitsisinnaasutut, pasineqarput.

Iisartakkat pujortarunnaarsaatit Champixit nunatsinni atorneqarpianngillat ataasiakkaannguillu kisiisa napparsimaveqarfinni nakorsaatinik tunniussisarfinnit inuttassaannut ingerlateqqinneqarsimasut, Nunatsinni nakorsaatinik tunniussisarfiup nalunaarutigaa.

Nakorsamit allagartaleqqaarlugu Champix aatsaat pineqarsinnaavoq maannamullu inuit namminneq iisartakkamik taassuminnga atuerusullutik saaffiginnittut marlussuit tunineqarsimapput.

- Nakorsaatini pujortarunnaarsaatit nalinginnaasut allattorsimaffianni Champix allassimasuutiginngilarput, taamaattumik taakkuninnga atuisut nammineq iisartagassatik akilertarpaat, farmaceut Dorthe Jørgensen Nuummi nakorsiartarfimmit oqarpoq.

Nakorsaatit pillugit Aqutsisoqarfimmi nakorsat inassutigaat, Champixinik iisartagartorusuttut – atuinermikkut kingunerluutigisinnaasaannik erseqqissumik ilisimatinneqartassasut.

Nikallungarujussualernerit - allaat imminut toqukkusulernerit - iisartagartornermi misigisimagaanni, erngerluni iioraaneq unitsittariaqarpoq nakorsamullu saaffiginnittariaqarluni. Nakorsaatit pillugit Aqutsisoqarfik taama nutaarsiassaqartitsivinnut nalunaarpoq.