Champions League KNR-TV-kkut aallakaatinneqanngilaq
Namminersulernissaq pillugu taasinitta saniatigut ullumikkut ulloq aamma tassaavoq Champions Leagimi AAB-ip, tassa Ålborg Boldklubip, aamma skotlandimiut arsaattartuisa, Celticikkikkut, Ålborgimi pingaarutilimmik unammiffigisaat.
Champions Leagimi unamminerit ilisimaneqartutut KNR-ip pinngitsoorani aallakaatittalissagai ungasinngitsukkut anguneqarpoq, taamaammat AAB-ip Celticillu ullumikkut unamminerat aallakaatinngimmagu isiginnaartartunit eqqumiigineqarpoq. KNR-TV-mi aallakaatitsivimmi immikkoortortaqarfik ullumi paasiniaavigigatsigu ima akissutisivugut:
- KNR-imi TV-mi aallakaatitsivimmi immikkoortortaqarfimmit ullumi aalajangerparput ilaqutariit meerartallit nutaarsiassallu ullumikkut pingaartinneruniarlugit, arsaattunik nuannarisallit pinnagit. Arsaannerit KNR-TV-p aallakaatittassagai TV3-lu isumaqatigiissutigineqareeraluarparput, imaanngilarli unamminerit tamarmik aallakaatinneqartassasut, KNR-TV-p aallakaatitsisarfianiit nalunaarput.
- Kanali Kalaallit Nunaanni ataasiinnaatillugu, kikkut tamarmik soqutigisaat aallakaatittarsinnaanngilavut, kisianni AAB-ip Celticillu unamminerat KNR-TV-kkut aqagu ulloqeqqata siorna nalunaaqutaq aqqanermut tanneq arfineq-pingasuniit aallakaatissavarput, KNR-TV-miit ilisimatitsipput.