Tennissimi normu 1-iunera tennissimi pitsaanerit allattorsimaffianni, ataasinngorpat tamanut saqqummiunneqassaaq.
Taamaalilluni qallunaat tennissernermi siullerpaamik timersuummi tassani pissartaqalerput, tamatumanilu Wozniackip Serena Williams maanna ajoquseqqasoq qaangerpaa, Serena Williams piffissami sivisuumi siuttuusimavoq ilaatigut Grand Slam-imi ukioq manna marloriarluni ajugaasarnini pissutigalugit.
Tennis pillugu immikkut ilisimasalik Peter Bastiansen ippassaq oqarpoq Wozniacki ajugaassagaluarpat qallunaat 1992-imi isikkamik arsaallutik EM-imi pissartanngornerannut sanillersuunneqarsinnaassasoq.
Wozniackip pissartanngornera Polenimi aamma tulluusimaarutaassaaq, tassami Caroline Wozniacki Danmarkimi inunngorpoq, Polenimiunilli angajoqqaaqarluni.