Cape Townimi ikuallarujussuarneq qatseruminaattoq
Sydafrikami ikuallarujussuarneq tamaani illoqarfissuup Cape Townip qeqqanut siaruaakkiartortoq anorlernera peqqutaalluni qatseruminaappoq.
Nutaarsiassaqartitsivik Ritzau taama allappoq.
Illoqarfiup Cape Townip ilisarnaataata qaqqap The Table Mountainip nalaani sapaatiummalli ikuallattoorneq, Cape Townimi ilisimatusarfiit ilaannut siaruaappoq.
Illut ilisimatusarfiullu atuakkanik atorniartarfiani katersat eriaginartut taamaalillutik aseruatiterlutillu ikuallapput.
Ilisimatusarfimmi ilinniartut ikuallannerup kinguneranik angerlartitaapput.
Qatserisartut 120-nit ikinnerunngitsut qulimiguullillu tallimat qatseripput.
Cape Townimi inuit hunnorujulikkaat isumannaallisaaniarluni illoqarfimmiit qimagussortinneqarput.
Inunnik ajunaartoqarsimaneranik ujaarinnittoqarneranilluunniit nalunaartoqanngilaq.