Cannes-mi filmitsialaat akissarsitinneqarput

Nunarsuarmi tamarmeersunik filmitsialannik toqqaaneq, Cannes-imi Frankrigimiittumi ippassaq ingerlanneqarmat, filmit Kangiani Qiterlermeersut Asiameersullu akissarsinerpaapput.

Rumæniamiut filmiliaat aatsaavissuaq akissarsiat akimanerpaartaannik ”De gyldne Palmer”-mik taaneqartartumik akissarsitinneqarpoq.

Filmi taanna ateqartinneqartoq ”Qaammatit sisamat, sapaatip-akunneri pingasut ullullu marluk” inerteqqutaasumik naartuersittarnermut aamma kommunistit nunami ingerlatsisuugallarneranni ullut kingulliit anngiortumik aningaasarsiorfiusut pillugit filmiliaavoq. Assut pikkugineqarsimavoq, naallu filmiliarineqarnera akikitsuararsuusimagaluartoq, tassa 4,5 mio. koruunit missaannik akeqarsimagami, pitsassuartut nalilerneqarluni.

Filmit katillugit 22-t filmiliarpassuit akornanni filmitsialattut unamminermi ilaatinneqarput, ilaatigut naliliisut torrallataanerpaatut toqqagaat, arnani angutinilu filmiliaritillaqqinnerpaat, aaqqissugaanera pitsaanerpaaq allallu akissarsiaritinneqarlutik.

Amerikamiu Jane Fonda filmiliaritillammattut Cannes-mi nersornaatisivoq.