Naggueqatigiit Inuit Pikialasorsuaq namminneerlutik aqukkusukkaat
Inuit Nunatsinneersut Canadameersullu Pikialasorsuarmi najugallit Pikialasorsuaq namminneerlutik aqussavaat.
Aamma Nunatsinni Canadamilu naggueqatigut Pikialasorsuarmi najugallit killiligaanngitsumik nunat akornanni angalasinnaassapput.
Isumaqalioqatigiissitat Naggueqatigiit Inuit siunnersuisoqatigiiffiata ICC-p ataaniittut Qaanaap Ellesmere Islandillu akornanni sikoqanngitsumi Canadap tungaaniittortaanut upernaaq tusarniaajartorput.
Sumiiffiullu Nunatsinniittortaani inooqatigiinni arfinilinni tusarniaanertik sapaatip akunnerata siuliani naammassivaat.
Immap sikup, silallu tamatikkarnerat, piniagassat ingerlaartarnerisa allanngorsimanerat ernummatigineqartoq, Pikialasorsuaq pillugu isumalioqatigiissitat tusarniaanerannut ilaatigut akissutigineqarsimapput.
Aamma atuaruk Pikialasorsuaq pillugu ICC-p isumalioqatigiissitaliai aallartilluarput
Taamaammat Inuit Pikialasorsuarmiittut sumiiffimmut namminneerlutik aqutterusunnermik ilaatigut kissaateqarput, assersuutigalugu piniarnermut inatsisimmik inooqatigiit inooriaasaannut naleqqunnerusumik pilersitsisinnaaniarlutik.
Allatut oqaatigalugu: Inuit Pikialasorsuaq inuuffigisartik nakkutiginerorusuppaat.
Pikialasorsuaq silap pissusaata allanngoriartorneranit, uuliasiornermit umiarsuarniillu angallavigineqarnerulernermit sunnertiavoq, ilaatigullu tamanna pissutigalugu isumalioqatigiisitat tusarniaajartorput.
