Imminut toquttarneq Canadami Inuit oqaluuseraat
Isumasioqatigiinneq tamanna Issittormiut Siunnersuisoqatigiivinit pilersinneqartoq aallarnerlugu, Issittormiut Siunnersuisoqatigiivini siulittaasup, Leona Aglukkap peqataasut 100-it sinneqartut tikilluaqquai.
Tamatuma kingorna oqalugiaqattaarnerit aallarnerlugit, ICC-Canadap præsidentia, Duane Smith oqalugiarpoq. Taassuma eqaartugaasa pingaarnersaralugit, Canadami Inuit taamatullu Issittormiut allat akornanni inuussuttut imminnut toquttartut amerlavaallaarujussuarneri.
- Imminut toquttarnerup oqaluuseriuarnissaa pingaaruteqarpoq, tassami tamanna tamatsinnut eqquisarpoq. Taamaattumik manna isumasioqatigiinneq pingaaruteqarpoq. Tassami qassit imminnut toquttarnerisa kisitsisitalernissaa kisiat eqqarsaatigissanngilarput, tassami ilaqutariinnut, ikinngutinut, suleqatinut qimagaasunullu tamanna eqquisarmat. Duane Smith oqarpoq.
Taassuma aamma ilanngullugu eqqaavaa, imminut toquttarnermut pissutaasut arlaqartut. Ilaatigut aningaasat ajornartorsiutaasarnerarpai, silap pissusaata allanngoriartornerata nassataanik pissuteqarnerarlugu aamma nunasiaataasimanerup nalaani ilugersunartunik naammattuugaqartarnermik pissuteqarnerarlugu. Aamma inigisat ajorpallaarneri, piitsuussuseq, imigassamik ikiaroornartumillu atuipilunnerit taamatullu inuussutissanik peqqinnartunik naammattunillu peqartannginnermik immunut toquttarnerit pissuteqarnerarlugit.
Issittuni nunani inuusuttut imminnut toquttarneri pillugit, Naalagaaffiit Peqatigiit Nunat inoqqaavi pillugit ataatsimiittartoqatigiivisa tamanna aprilimi sammisussaavaat.
