Canadap kimmut sineriaani kapisilissaaleqipput
Kuussuarmi Fraserimi Canadap kimmut sineriaanut kuuttumi ukioq manna kapisileqarluarnissaa ilimagineqaraluarpoq. Naatsorsuinikkut kapisillit 10 millionillit sinneqalaartut takkusimaarumaartut ilimagineqaraluarpoq, naatsorsuisarnernili ukiorpassuarni eqquuttarsimasuni aatsaat uniuisoqarunarpoq. Kuuk maanna aalisagaqarpianngilaq kapisillillu taamaallaat millionit kuummiikkumaartut ilimagineqarpoq, tassa pisarnertut takkuttartut qulerarterutaannaat.
Kapisillit 9 millionillit periarfeerunneqarput. Taakkulu sumut pisimanissaat apeqqutaaginnalerpoq. Kuummut qanittumi aalisakkanik tukertitsiveqarmat kapisillit piaraat kumannik tukertitsivinneersunit tunillanneqarsimasinnaapput. Kapisillit piaraat kumaqaleraangamik alliartornerat unittarpoq toqullutillu. Aamma avatangiisini suli paasineqanngitsumik allanngortoqarsimasinnaavoq.
Ataaserli maanna qularnanngilaq, indianerit namminneq pissaminnik tuniniagassaminnillu kapisilinniartuartuusut ukioq manna susaartussanngorput. Takornarianillu tikisitsisartut aamma atugarliortussaapput tassami takornariat aalisarfissaqarnatik tasamunnarunnanngimmata.
Indianerinut takornarianullu Fraserip kuussuata eqqaaniittunut ajunaarnersuuvoq. Tamaanimiut Canadamilu aalisarnermut ministereqarfimmeersut qanoq pisoqarsimaneranik maanna paasiniaaleruttorput.
