Canadap issittortaani niuffatissanik saqqummersitsineq

Niuffatissanik ukiumoortumik saqqummersitsinersuaq Northern Lights, Ottawami ippassigami tallimassaaneerneqarpoq. Saqqummersitsinersuarlu ukiut ingerlanerini alliartuinnavissimavoq. Labradorimi Baffin Islandsimilu niuertut peqatigiit tamassuminga aaqqissuussisuupput, tassanilu nioqqutissanik, kusanartulianik aammalu issittumi pisiassanik takutitsipput.

Saqqummersitsinersuarmi Nunavut, Nunavik Nunatsiavullu sammineruaat.

Niuffatissanik saqqummersitsineq ataatsimeersuartarfimmi Ottawap qeqqaniittumi pisoq ullunik sisamanik sivisussuseqarpoq, ornigarneqarluaqalunilu. Tassalu ukioq manna peqataasut 1200-ut saqqummersitsivinnit 96-init nioqqutissaatiminnik kiffartuussissutiminnillu takutitsipput.

Saniatigullu eqqumiitsuliortut naggueqatigiit inuit aammalu Innut 75-it sinneqartut eqqumiitsuliaminnik tuniniaapput.

Air Greenland aamma saqqummersitsinermi peqataavoq.

Niuffatissanik saqqummersitsinersuaq suliffeqarfissuarnit nuannarineqarlualersimaqaaq, soorluttaaq aamma naggueqatigiit Inuit indianerilluunnit tunisassiaatiminnik saqqummiiffigisaraat, taavalu Canada kujasissortaaneersut issittumi inuussutissarsiortut sunik suliaqarnerannik alakkaasarlutik.

Aammattaaq ministeriunerup Trudeaup niuffatissanik saqqummersitsinersuaq ukioq manna alakkarpaa, naggueqatigiillu Inuit tunisassiaatiminnik saqqummersitsisut kusanartuliaatiminnillu takutitsisut sivisuumik najorlugit.

Siunissami niuernerunissamut periarfissaqarluarpasippoq. Ulluni makkunani, niuffatissanik saqqummersitsinermiit ullualuit qaangiutiinnartut niuertut peqatigiit marluk angusaqarluarsimallutik oqaatigaat.