Canadap issittortaa nunarsuup sinneranit pingasoriaammik kissakkiartorneruvoq
Ukiuni arlalinni misissuisoqarpoq, nalunaarusiarli Canada's Changing Climate, Canadami naalakkersuisunit sapaatip-akunnerata massuma ingerlanerani saqqummiunneqarpoq.
Immikkut ilisimasallit Canadap naalakkersuisuisa ataanni sulisut, immikkullu ilisimasallit ilisimatusarfinneersut, nalunaarusiortuupput.
Canadap issittortaa nunarsuup sinneranut naleqqiullugu pingasoriaammik kiatsikkiartortigisoq nalunaarusiami inerniliunneqarpoq. Issittup agguaqatigiissullugu 2,3 gradinik kiannerulersimaneranik takussutissaqarpoq.
Canada ataatsimut isigalugu nunarsuup sinneranut naleqqiullugu 1,7 gradinik kiannerulersimavoq, tassa nunarsuup sinneranut naleqqiullugu marloriaatingajaanik kiannerulersimalluni.
Tamanna immap sikuata annikilliartupiloorneranik kinguneqarpoq, soorlu aamma nuna qeriuannartoq aakkiartornerulersoq, sermit iigartartut aakkiartuinnartut sermersuillu saaliartuinnartut, nalinginnaasumiillu kiannerulertanngikkuni issinnerulertarsinnaasoq.
Canadap issittortaata nalinginnaasumiit kianneruleriartornera tamaani najugalinnut assigiinngitsutigut sunniutipiloqalissasoq, nalunaarusiap takutippaa.
