Canadap inoqqaavi 49-t toqutaasimasut paasineqarpoq
Canadap kangimut sineriaani Vancouverimi, ukiut qulit matuma siorna canadap inoqqaavi Inuit arnat arlallit tammaaneqartalerput.
- Arnat ulluinnarni imatut maluginiarneqarneq ajortut, nutaarsiassani taamatut allaaserineqartarput, - arnat inuiaqatigiinni pingaaruteqanngitsut, soorlu: Eqqillit, arnat europamiunit aamma inunnit akusat aammalu arnat Canadap inoqqaavinit kingornisut, Inuit.
Arnat tammaaneqaraagamik nassaarineqarneq ajorput. Tammaaneqartut ilaqutaat isumaqarput, politiit qanoq iluuseqarpiarneq ajornarannik tamanna kinguneqartartoq, tassami tamaanneqartut "inuinnaammata", assuarinninneq taama nipilik saqqummiunneqarpoq.
2002-mi tigusarineqarpoq parnaarunneqarlunilu puulukiutilik Robert Pickton. Politiit nalunaarusiaat aatsaat maanna kikkunnut tamanut saqqummiunneqarmat tamanna ilisimaneqalerpoq.
Pisimasoq Canadamiunit tupaallaatigineqaqaaq.
Arnanik 49-nik toqutsisimanera pillugu aammalu toqutsigaagami arnat toqutani nassaarineqarsinnaajunnaarsittarsimammagit, tassami toqutami timaat puulukiutiminut nerukkaatigisarsimagamigit. Politiinit nassaarineqartut sinnimerngi, tassalu inuit DNA-vi marullummi puulukit eqqaanniitut kisimik nassaassaasimapput.
Pickton killisiorneqarami oqarsimavoq, peqqissimissutini ataasiinnaasoq tassalu arnarnik 50-nik toqutsisimannginnami, tassami tamanna anguniarsimagaluaramiuk.
Pisumik misissuisimaneq taama sivisutigisumik ingerlanneqarsimammat canadamiut mamiatsaatigisaannut aamma ilaavoq. Taamaammallu ilimagineqarpoq, politiit mississuigaagamik misissuinerat kingaannerusartoq nunap inoqqaavi pineqaraagata.
Sivisuumik mississuisimaneq qulaajarniarlugu maanna Canadami Naalakkersuisut misissuisitsilersaarput, taamaaliulerput pisup assiganik pisoqaqqinnginnissaa anguniarlugu.
