Canadamut angalaneq isummanik allanngortitsinngilaq

- Aqunneqarsinnaasumik aammalu killissamik aalajangersimasumik killissalerlugu uranimik akulimmik aatsitassarsiorsinnaaneq periarfissiissutigineqartariqarpoq, Simon Simonsen oqarpoq.

Kommune Kujallermi borgmesteri Simon Simonsen isumaqarpoq, aatsitassanik uranitalinnik piiaanngilluinnarnissamik Naalakkersuisut isummernertik qanganisarsiortuusoq allanngortittariaqaraat. Taamaaliornissaq nukiginnarsivoq, kujataani suliffissaaleqineq ilungersunarmat.

- Siunissami ingerlaqqissagutta aamma innuttaasut suliffissaaleqinermit aniguisissagutsigit periarfissanik nutaanik ammaanissarput pisariaqarluinnalernikuuvoq, borgmesteri oqarpoq.

Kommuni Kujallermi kommunalbestyrelsemi ilaasortaq, Lasse Davidsen, Canadamut angalanermi aamma ilaavoq. Kisianni misigisat taakkorpiaat politikerip Inuit Ataqatigiinneersup Kuannersuarnilu aatsitassarsiulernissamut akerliuneranut sakkortunerulersitseriaannarsimapput. Rapid Lakemi uranisiorfiup eqqaani avatangiisit immikkut maluginiarsimavai:

- Taakkua qangaanerusoq piiarsimasaat orpippassuit akornannut eqqarneqarsimapput, tamaanilu nunami annertuumi orpiit asingalallutik toquliortitersimapput, Lasse Davidsen oqarpoq.

Inuussutissarsiornermut aatsitassanullu naaalakkersuisoq Ove Karl Berthelsen, aamma Canadaliaqataasoq, isumaqarpoq Nunarput nakkutiginninnissamut isumannaallisaanissamullu suli piareersimanngitsoq.

- Canadap naalagaaffiata nakkutilliinernut assigiinngitsunut inuit 850-it sulisorigai oqaatigineqarpoq. Taassuma saniatigut nunap immikkoortuini nakkutilliiisut allat atorfissaqartinneqarput. Taavalu aamma uranip qanoq ingerlanneqartarnera, kikkunnit pisiarineqartarnera aamma qanoq atorneqartarnera nakkutigineqarmata, inupparujussuit tamatuminnga suliaqarlutik, naalakkersuisunut ilaasortaq oqarpoq.

Tassalu aatsitassanut uranitalinnut naaggaarnerup allanngortinnissaanik Simon Simonsenip kissaataa Ove Karl Berthelsenip isumaqatiginngilaa.