Canadamiut uuliamut ruujorersualiorniarput
januaarip 24-at 2007 07:47
Canadami North West Territoriamiut tassa Inuialuit Nunaamiut, uuliamut ruujorersualiornissamik, suliffissanik ilinniarfissanillu pilersitsisinnaasumik isumaqatigiissusiorput.
Suliffeqarfik McKenzie, uulianut ruujorersuarnik nioqquteqartoq isumaqatigiissuteqarfigineqassaaq.
Ruujorersuarmut 1.220 kilometerinik takissuseqartussamut, dollarinillu milliardinik arlalinnik akeqartussamut, suliffeqarfiit suleqataasussat tallimaapput. Shell Canada aamma Aboriginal Pipeline Group ilaallutik.
Suliffeqarfiit akornanni isumaqatigiissutissaq, aningaasarsiornermut inooqatigiinnermullu sunniuteqartussaq, 67-inillu qupperneqartoq ataasinngormat nalunaarutigineqarpoq, nutaarsiassaqartitsivik cbc taama tusarliussivoq.
