Canadamiut sorsuutaat marluk issittup imartaanukarput
Sungiusarneq sakkutuunut imarsuiortunut aamma silaannakkut sakkunik igeriuttakkanik sungiusarnerinnaassanngilaq aammali Canadap immamik nunamillu issittuniittunik piginnittuunini takutinniarlugu sungiusarneq ingerlatissavaa.
Umiarsuit sorsuutit Qaujuittuup, tassa Resolute Bay-ip tungaanut aallareersut løjtnant Justin Simmonsip CBC-mut oqaatigaa.
Qaujuittoq allorniusat sanimukartut 72-aniippoq, tassalu aatsaat taama avannarpasitsigisumut sakkutuut umiarsui ingerlaarput.
- Taama avannarpasitsigisumukarnerput sikusiortarnermik ilinniarfigisinnavarput, løjtnant Justin Simmons oqarpoq.
Operation Nanook-imut ilaapput saakkutuut amerikamiut aamma danskit sakkutuui, taakkulu saniatigut canadamiut sakkutuui 900-t peqqataallutik.
Canadami ilanngutassiortorput Marianne Stenbæk taama ilanngutassiivoq.