Canadamiut siulittaasunngornissartik piareersaleruttorpaat
Ataatsimeersuarnerup ingerlanerani Canadamiut issittumut soqutiginninnerulersimanerat, issittullu Canadamut pingaaruteqarnera periarfissarissaartitsineralu eqqumaffigineqarnerulersimasoq Yukonimi naalakkersuisuni siulittaasuusimasup Tony Penikottip oqaatigaa.
- Issittumi siunnersuisooqatigiinnut ukiut tullinnguuttut pingaaruteqartussapilussuussapput, Sarah French, Munk-Gordon Centerimeersoq ataatsimeersuarnermilu aaqqissuisuusoq taama oqarpoq.
Issittumimi siunnersuisooqatigiit ingerlarngat allanngoriartorpoq, ilaasortaasummi akornanni pituttuisunik isumaqatigiissusiortarneq atorneqarnerulersimavoq, siornatigutuut atsioqatigiiginnartarneq siunnersoqatigiittarnerlu atorneqarpallaarunnaarsimalluni. Siornami imaani annaassiniartarnermut ujaasisarnermullu suleqatigiissutissamik atsioqatigiinneq allanngoriartornermut takussutissaavoq, naak atsioqatigiittunut annertuumik pisussaaffiliinngikkaluartoq.
Aamma issittumi pisuussutinik piiaaneq sakkutooqarnerlu Issittumi Siunnersuisooqatigiit samminerulissagaat nunat assigiinngitsut kiisa piumasarisalerpaat, tassami Canadamiut Russillu issittumi sakkutooqarfitik sakkussiaatitillu amerlisimammatigit.
Issittumi siunnersuisooqatiinni assortuussutaalluartut ilaat tassaavoq kikkut ilaasortaassanersut. Nunarsuummi avannarpiaani suli piiaaffigineqarpallaarsimanngitsumi pissaaneq tigummiinnarneqarusummat, taamaattumik nunat issittormiuunngitsorpassuit Issittormiut Siunnersuisooqatigiianni alaatsinaattutut akulerussuukkusuttut amerlassusissaat killilersorneqarusuppoq. Siunnersuisooqatigiilli issittoq pillugu pingaarutilinnik aalajangiussaqartarneq nukittullutik ingerlatiinnassagunikku, taava allatut ajornartumik imminnut mattuttariaqanngillat, tamannalu assortuussutaaqaaq.
Nunat angisuut pilerngorussaanik Issittumi Siunnersuisooqatigiinni alaatsinaattunngorniarunik, taava nunap inoqqaavisa kattuffii Siunnersuisooqatigiinni ilaasortaareersunut - soorlu Samerådinut ICC-mullu - akiliuteqartalernissaat ataatsimeersuarnermi ilaatigut siunnersuutigineqarpoq.
Naatsumik oqaatigalugu: Canadamiut siulittaasunngortut suliassaaleqissanngeqaat. Svenskit Issittumi Siunnersuisooqatigiinni ullumikkorpiaq siulittaasuupput; siulittaasuunerlu siorna Nuummi persuarsiorpalaartumik Danmarkimiit kingornuppaat.
