Canadamiut nannut pillugit nutaanik malittarisassaliortut
Illoqarfik Canadami nannunut illoqarfiit pingaarnersaattut taaneqartarpoq, illoqarfimmi nannut qeriuaannartup masarsuinit Hudsonip Kangerliumarnganut nerisassarsiorlutik ingerlaartarfiisa eqqannguaniimmat.
Nannut aatsaat inunnik aarlerinartorsiortitsileraangata, aallaaneqartarput. Nannut qimaatinniarsaralugit misilinneqartarput imaluunniit tigusareriarlugit allamut nuunneqartarlutik.
Maannali nannunik ajornartorsiuteqarneq ima angitigilerpoq, nannut uumasuusivissuarnut pisinneqarsinnaanerinut inerteqqut, Manitobami oqartussanit atorunnaarsinneqarluni.
Nannut suli marlunnik ukioqalersimanngitsut kisimik maannamut uumasuusivissuarnut nassiunneqarsinnaasaraluarput.
Jim Duncan, Manitobami pinngortitamut pisortaqarfimmi pisortaasoq, aviisimut Globe and Mail-imut oqarpoq, malittarisassat nutaat nannunut pitsaasuusut, taamaalillutimmi Churchillimi nerisassarsiorlutik aqqusinerni angalaartillutik aallaaneqarnissaannit annaanneqassammata.
Maannami ilisimajunnaarteriarlugit uumasuusivissuarnut ilisimatuutulluunniit misissuivinnut ingerlanneqarsinnaassammata, taamalu misissoqqissaarneqarlutik, taamaalilluni silap pissusiata allanngoriartornera nannunut qanoq sunniuteqarnersoq annerusumik paasisaqarfigineqarniassammat.
