Canadamiut misilittakkaminnik avitseqatiginnikkusupput

Naalakkersuisut siulittaasuata, Kuupik Kleistip tikeraat Canadameersut naapinnerat iluaraa:

- Soorunalimi uagut nunatsinni pisariaqartipparput allanik misilittagalinnik oqaloqartarnissaq aammalu misilittakkanik atorluaanissaq aallaqqaataaniit kukkussutaasinnaasut pinngitsoortinniarlugit, Kuupik Kleist oqarpoq.

Kisianni sutigorpiaq suleqatigineqarsinnaappat?

- Inuiaqatigiit uuliasiortoqassappat annertunerpaamik pissarsisinnaanerannit qanoq piareersartoqarsinnaanera, ilinniartitaanikkut allatigullu sullissinikkut aammalu aqutseriaatsit eqqarsaatigalugit misilittakkatik apuukkusuppaat aammalu neqeroorutigalugu assigiinngitsutigut suleqatigiissinnaaneq, Kuupik Kleist oqarpoq.

Canadami uuliamik ukiut 25-t matuma siornatigut siullermik nassaartoqarpoq, maannarpullu misilittakkaminnik avitseqateqarumallutik.

- Ukiuni 25-ni misilittagaqarpugut, ilissinnut tunniuterusutatsinnik. Naalakkersuisusi suliffeqarfiutisilu suleqatigerusuppagut, uuliamik gassimillu qalluilerumaarnissanut piareersimaneruniassammata, Canadami nunap immikkoortuini marlunni tunisassiassanik ineriartortitsinermut, niuernermut sumiiffiillu ineriartortinnissaannut ministeri, Shawn Skinner oqarpoq.

Naalakkersuisuni ilaasortaqataa, ministeriunermut tullersorti pisuussutinullu uumassusilinnut ministeri, Kathy Dunderdale isumaqataavoq.

- Kalaallit Nunaannut iluaqutaaginnarani aamma Akilinermi New Foundlandimut Labradorimullu iluaqutaasussamik suleqatigiinnissamik isumaqatigiissusiorsinnaalluta isumaqarpugut, Kathy Dunderdale oqarpoq nangillunilu:

- Uuliasiorneq qanoq aallartisarneqarsinnaanersoq, uuliasiortut aallartisarneranni qanoq ikorfartorneqarsinnaanersut aammalu uuliasiorfinnut qanittunik najugaqartut qanoq pitsaanerpaamik ilinniartinneqarsinnaanersut, immikkut ilisimasaqarfigisupilussuuarput. Tamakku tamaasa katillutik uuliamik qalluinitta iluatsittumik iluaqutiginissaat qularnaarpaat.

Akilinermi nunat immikkoortuini marlunni uuliamit isertitat ilarpassui attaveqatigiinnermut atortorissaarutinik sanaartornermut, atuarfinnut napparsimmavinnullu atorneqarput. Tassalu uuliaqarfiit paqqeraluarpataluunnit uulia qaqugumut iluaqutaasussanik pilersitsivoq.

- Uulia nunguppat, nunap immikkoortuanut tamatumalu inuinut nalituumik kingornussassaqassaaq. Inuuniarnikkut atukkat attatiinnarnissaannut inerisarnissaannullu periarfissaqassapput, Kathy Dunderdale oqarpoq.

Taanna nassuiaavoq, nukissiuutinik pinngortitamut aseroriartuutaanngitsunik ineriartortitsinermut nunap immikkoortui marluk aningaasaliisaqisut.

Candami naalakkersuisut aallartitaat Nunatsinnut ukiut tallimat ingerlaneranni sisamassaa tikeraarput. Kisianni akulikinnerusumik tikeraartalernissartik, Shawn Skinnerip siulittorpaa.

- Kalaallt Nunaata paasisassarsiorfiginissaa maannakkorpiaq pingaarnerpaavoq. Mannarpugut suleqatiginnikkusulluta, sunik neqeroorutissaqarnitsinnik oqaluttuariartorluta, aammalu sunik uatsinnut neqerooruteqarsinnaanersusi paasiumallugu. Taamaaliorutta qaninnerusumik attaveqatigiilissaagut, taava aningaasarsiornikkut periarfissat aamma malinnaassapput, Shawn Skinner oqarpoq.

Aamma isumaqarpoq, aatsitassaannaanngitsut suleqatigiissutigineqarsinnaasut. Takornariartitsisarneq immakkullu angallanneq aamma suleqatigiissutigineqarsinnaasutut eqqaavai.

Akitsinni Canadami nunat immikkoortui New Foundland aamma Labrador nunatsinnut angalatitaqartuupput, taakkulu naalakkersuisut aallartitaat angerlamut aqagu aallassapput.