Canadamiut immap nillertup raajanik avammut nioqqutissiulerput

Inuit niuernermik suliffeqarfissuata Makivik Corporationip, aalisakkanik suliffeqarfissuaq Newfound Recources Limited Newfoundlandimeersoq suleqatigiinnissamik isumaqatigiissuteqarfigisimallugu ullumi nalunaarutigaa.

Suliffeqarfissuit taakku marluk Ungavap kangerluani, Nunaviup kangiatungaaniittumi, Hudson strædemilu raajarniarnissamik isumaqatigiissut sapaatit akunnerani uani atsioqatigiissutigaat.

Makivik 1979-miilli raajarniarnissamut akuersissuteqarsimavoq, taamani Hudson strædemi Ungavallu kangerluani raajaqarnera paasineqarmat. Suliffeqarfissuaq suleqatigineqalersoq, Newfound Resources, 1991-miilli raajarniarnissamut akuersissummik pissarsisimavoq.

Suliffeqarfissuit taakku marluk ukiuni kingullerni arfinilli aalisarnikkut suleqatigiissimapput.

Canadami aalisarnermut ministeriaqarfik immap nillertup raajaanik kiisalu immap nillertup raajaanik allalinnik - pandalus montaguinik taaguuteqartunik - pisassiissutinik nutaanik pingasunik juulip aallartinnerani akuersissuteqarmat, suliffeqarfissuit taakku marluk aalisarfimmi nutaami, NU/NK kangiani kitaanillu taaguutilimmi, aalisaqatigiinnissamik siullerpaamik isumaqatigiissuteqarput.

Makiviup siulersuisuini siulittaasup tulliata, Michael Gordonip, tusagassiortunut oqaatigaa, raajat allallit pisuussutaasut ilisimasaqarfigineqarpallaanngitsut, taakkulu suliffeqarfiit nalinginnaasumik aalisarfigisartagaamnit ungasinnerumi aalisarfimmi nutaami aalisarneqartussanngortut.

- Raajat allallit niuerfinni amerlanerni ilisimaneqarpallaanngillat, taamaammat aamma tuniniarneqarnissaat piffissaq sivisooq atorlugu inerisaaffigineqartariaqassaaq. Siorna misileraalluni aalisarneq isumalluarnartupilussuarnik inerneqarfiuvoq, Michael Gordon oqarpoq.

Raajat nunarsuaq tamakkerlugu tuniniarneqarnissaat naatsorsuutigineqarpoq, pingaartumillu Kinami niuerutigineqarnissaat isumalluarfigineqarluni.