Canadamiut iluliarujussuarmut qullernik ikkussiniarput
Canadami sikunik alapernaarsuisut aaliangiussimavaat iluliarujussuaq Canadap imartaanut pippat, napparummik qullertalimmik ikkussivigineqassasoq ingerlaarnera malinnaafigineqarsinnaaniassammat.
Iluliarujussuarmi angallannermut ajoqutaalissasoralugu uuliasiorfinnillu aqqusaalutorinnissasoralugu ernummatigineqarpoq.
Canadamiut iluliarsuit Nunatsinniit tissukartut nalinginnaasumik nuannaarutigisaqaat. Newfoundlandimi Labradorimilu takornariarpassuarnit takuniarneqartarput,ilisimatuullu silap allanngoriartorneranut tunngasunik ilisimatusartut paasissutissarpassuarnik pissarsiffigisarmatigit.
Taamaakkaluartorli allat iluliarujussuarmut ernummapput. Ernumasullu tassaanerupput imarsiortut sinerissamilu nakkutilliisut.
Iluliarujussuaq imaluunniit taassuma ilanngakui ukiup ataatsip missaa qaangiuppat Labradorimut Newfoundlandimullu pinissaat naatsorsuutigineqarpoq.
Nutaarsiassaqartitsivik Ritzau naapertorlugu iluliarujussuup 260 kvadratmeterisut takitigisup kaanngarneratigut 1962-miilli aatsaat taamak Nunatsinni angitigisumik kaanngartoqaqqippoq.
