Canadamiut aallartitaat nunatsinnut tikeraalerpoq

Naalakkersuisut Great Greenlandi piumasaqarfigimmassuk New Foundlandimit puisit amiinik pisisarunnaassasut Canadamiut piniartuinut eqquivoq. Taama oqarpoq canadamiut aallartitaat Fredericka Gregory, Sermitsiamut ullumi saqqummersumut. Aallartitaq qaammatip uuma ingerlanerani nunarput tikeraassavaa.

-Qulakkeerusupparput Kalaallit Nunaata paasissagaa, naalakkersuisut aalajangiinerat qanoq pingaaruteqartiginersoq, Fredericka Gregory oqarpoq, naqissuserpaalu Atlantikup Avannaani miluumasut imarmiut pillugit ataatsimiititaliarsuup NAMMCO-p puisinik ikuttaalluni toqutsisarneq akuerinikuummagu.

Uumasunik illersuiniaqatigiit nunatta puisit amiinik eqqussisarnera sammilermassuk, Naalakkersuisut januaarimi puisit amiinik Canadameersunik piseqqusiunnaarput. Naalakkersuisut piseqqusiunnaarneq upernaap ingerlanerani eqqartoqqissaavaat. Aallartitap nunatsinnut tikeraarnerani nunanut allanut naalakkersuisup Josef Motzfeldtip Canadap nunattalu akornanni suleqatigiinnerunissaq eqqartussallugu nalunaaruteqarpoq.