Canadami ullorissap anaata qaarnera uippallersitsivoq

Ullorissap anaata nunarsuup silaannartaanut pinermini qaarpallannerujussuartut nipaa, inuit arlallit tusaagamikku politiinut sianersimapput.

- Siullermik isumaqaraluarpunga qummoroortartortoqartoq, taamaattumimmi siornatigut takusimanngisaannarama, nunaatilik Marcel Gobeil aviisimut Daily Mailimut oqarpoq.

Taassuma oqaluttuaraa ullorissap anaa angerpaseqisoq, issariarnernilu qulini takussaanermini qalipaataa qorsooriarluni tungujortunngortoq naggataagullu aappaluttoq qaamasunngorluni.

Politiit biliisa saavatungaani assiliissutip alapernaarsuutip qilammi nipilioqisoq taanna assilisimavaa.

Norgimiup ulloriarsiuup Knut Jørgen Røed Ødegaardip oqaatigaa ullorissap anaata qaarnera akuttusoorujussuarmik videuliarineqartartoq. Ullorissap anaa, ullorissat anarpassuisa Leoniderne-mik taaneqartut, ukiut tamaasa nunarsuatsinnik saneqqussisartut ilagisimassagunaraat oqaatigineqarpoq.