Canadami tuberkulosep atuukkunnaarsinnissaa pimoorullugu sulissutigineqalersoq
Inuit Nunangani TB ajornartorsiutaasupilussuuvoq, Canadamilu naalakkersuisut naggueqatigiit inuit siuttui peqatigalugit TB-p akiorneqarnissaanut nappaatillu atuukkunnaarnissaaanut piumoorussamik suliniuteqartussanngorput.
Nittartagaq NunatsisaqOnline taama allaaserisaqarpoq.
TB-eqartarnerlu ima ajornartorsiutaatigaaq Canadami naggueqatigiit inunninngaanneersuunngitsut naggueqatigiinnut inunnut sanilliullugit 270-eriaammik amerlanerusarlutik.
Ministerillu Jane Philpottillu erseqqissaatigaa, naggueqatigiit inuit akornanni inuttut atugarissaarnikkut suliniuteqartoqassasoq.
TB-p akiorniarneqarnissaanut qaangerneqarnissaanullu atatillugu pimoorussamik suliniuteqarnermi nunarsuarmi TB-p ullorititaani, tassa marsip ulluisa 24-annut ullulerneqartumi, naalakkersuisut saqqummiissapput.
Tamatumunngalu atatillugu Jane Philpottip niviarsiannguaq TB-qarsimasoq issuaavigaa,
Ileen Kooneeliusie 15-iinnarnik ukioqarluni Ontariomi meeqqat napparsimmavissuani januaarimi toquvoq.
CBC Iqaluit naapertorlugu nunaqarfimmi Qikiqtarjuarmi inuusuttuannguaq sapaatip akunneri arlallit sioqqullugit perululluni napparsimasimavoq, ullormilu toqquvissaani TB-eqartoq aatsaat kalerrinneqarsimalluni.
UNICEF-imi allaffissornermut pisortaasimasoq Stephen Lewis Nunavummut siorna septembarimi tikeraartoq oqarpoq, TB pillugu Canadap suliniuteqarnera killeqarsimaqisoq.
TB pillugu suliniuteqarneq ITK-mit Inuit Tapiriit Kanatamit pimoorunneqarpoq. Premierminister Justin Trudeau aamma ITK-mi siulittaasoq Natan Obed siorna naapeqatigiipput.